Menu
Laburpena
Biribiltasunak ez du amaierarik. Ez dakigu non hasten edo amaitzen den.
Biribiltasun horretatik ateratzea aukeratu dezakegu? Zirkuluan ibiltzearen sentsazioarekin pasatzen gara mundutik, alegia, gauzak behin eta berriz bizitzearen sentsazioarekin, batzuetan bizkorrago eta beste batzuetan mantsoago. Baina eguneroko eta errutinazko jario horretan beti daude arrakalak. Baztertu al daiteke monotonia, eta gauzen norabidea aldatu? Zer da benetan garrantzitsua? Zerk bultzatzen gaitu gauzak egitera? Zerk bultzatzen gaitu zirkuluan jarraitzera? Zerk eragiten digu gelditzea, haustea, erritmoa aldatzea...?
Ikuskizun honek oso gai garrantzitsua aztertzen du –biribiltasuna–, umorea gure aliatu eta bizilagun bihurtuz.
“Trotamundos Cía.” zirku-konpainia bat da, Mailén Mansillak eta Luciano Mezzoterok 2015ean Argentinako Buenos Aires hirian sortua.
Bere helburu nagusia nortasun propioa duten ikuskizunak sortzea da. Akrobaziak, objektuen manipulazioa, hula hoop-ak eta clown-a lanabes harturik, testurik gabeko istorioak kontatzen ditu, hainbat espaziotan antzeztu daitezkeenak, makina bat publikorengana iritsiz.
2016an, Bilbon –Euskal Herrian– finkatu ziren, eta lehenbiziko ikuskizuna sortu zuten: Historias de un Baúl, Txefo Rodriguezen zuzendaritzapean. Bi urtez ikertu eta bilatu ondoren, 2017ko maiatzean estreinatu zen Leioako "Umore Azokan".
Harrezkero, 210 emanaldi baino gehiago egin dituzte, Espainian, Frantzian, Portugalen, Aljerian, Argentinan, Txilen, Brasilen eta Arabiar Emirerri Batuetan.
2022aren amaieran, bigarren ikuskizuna sortzen hasi ziren: Finito-Infinito.
